U-19 karla | 2. sætið á Sparkassen eftir vítakeppni

U-19 ára landslið karla lék til úrslita á Sparkassen Cup í Merzig í Þýskalandi. Andstæðingarnir voru Þjóðverjar og er óhætt að segja að um magnaðan leik hafi verið að ræða fyrir framan fulla höll í Merzig.

Í upphafi var aðeins eitt lið mætt lið leiks, Þjóðverjar komust í 1-5 á fyrstu 5 mínútunum og leit út fyrir að þeir myndu eiga auðveldan dag. En eftir að íslenska liðið skipti í 5-1 vörn náðu þeir smám saman að minnka muninn og þegar flautað var til hálfleiks var staðan 10-12 Þjóðverjum í hag.

Síðari hálfleikur var stál í stál frá fyrstu mínútu, Þjóðverjar höfðu nauma forystu framan af hálfleiknum en þegar 10 mínutur lifðu leiks náði íslenska liðið að jafna 20-20. Þá koma nokkrar brottvísanir og íslenska liðið lenti aftur 2-3 mörkum undir. Þjálfarateymið tók leikhlé þegar 40 sekúndur voru eftir og liðið 2 mörkum undir. Strákarnir gerðu sér lítið fyrir og skoruðu 2 mörk á þessum stutta tíma og því fór leikurinn í vítakeppni.

Í vítakeppninni fengu liðin 3 víti hvort, skemmst er frá því að segja að íslenska liðið misnotaði fyrstu tvö vítin á meðan Þjóðverjar nýttu sín og því höfðu þeir sigurinn að lokum.

Markaskorar Íslands:
Kjartan Þór Júlíusson 6, Elmar Erlingsson 4, Eiður Rafn Valsson 3, Skarphéðinn Ívar Einarsson 3, Össur Haraldsson 3, Reynir Þór Stefánsson 2, Atli Steinn Arnarson 1, Hinrik Hugi Heiðarsson 1, Daníel Örn Guðmundsson 1, Hans Jörgen Ólafsson 1, Þorvaldur Örn Þorvaldsson 1,

Ísak Steinsson varði 2 skot og Breki Hrafn Árnason varði 1 skot.

Það verður að hrósa strákunum fyrir mikinn karakter í leik kvöldsins, þeir lentu undir eftir erfiða byrjun en komu sterkari tilbaka og náði jafntefli gegn geysisterku Þýsku liði. Spilamennska liðsins hefur verið vaxandi í mótinu og fer í reynslubankann fyrir HM sem fer fram í Króatíu næsta sumar.