U-18 karla | 11 marka sigur á Hollendingum
Strákarnir okkar í U-18 ára landsliðinu léku við Hollendinga í hádeginu í dag í öðrum leik liðsins á Nations Cup í Lübeck. Strákarnir hófu leikinn af miklum krafti og lokuðu vel á hratt spil Hollendinga. Mörg góð hraðaupphlaupsmörk komu í kjölfar öflugs varnarleiks. Forskot Íslendinga jókst eftir því sem leið á hálfleikinn og þegar hálfleiksflautan gall var staðan 21-11 okkar strákum í vil. Frábær fyrri hálfleikur að baki.
Strákarnir leyfðu Hollendingum ekkert að komast í leikinn í síðari hálfleik. Spilamennska liðsins var í góðu jafnvægi allan tímann og þegar yfir lauk höfðu íslensku strákarnir unnið 11 marka sigur, 39-28. Brunavarnakerfi keppnishallarinnar í Lübeck fór í gang þegar 18 mínútur voru eftir af leiknum og þurfti að gera 20 mínútna hlé á leiknum á meðan allir keppendur, starfsmenn leiks og þeir fjölmörgu áhorfendur sem fylgdust með leiknum þurftu að yfirgefa höllina á meðan fundið var úr málinu. Þetta hafði lítil áhrif á okkar stráka sem héldu síðan ótrauðir áfram eftir pásuna.
Markaskor Íslands:Atli Steinn Arnarson 6, Elmar Erlingsson 6, Skarphéðinn Ívar Einarsson 5, Andri Fannar Elísson 4, Kjartan Þór Júlíusson 4, Sæþór Atlason 4, Þorvaldur Örn Þorvaldsson 3, Birkir Snær Steinsson 2, Hans Jörgen Ólafsson 2, Hinrik Hugi Heiðarsson 1, Viðar Ernir Reimarsson 1, Össur Haraldsson 1.
Í markinu varði Ísak Steinsson 10 skot, 45% varsla og Breki Hrafn Árnason 7 skot, 30% varsla.
Á myndinni má sjá Skarphéðinn Ívar Einarsson og Ísak Steinsson en þeir áttu frábæran leik í dag.
Á morgun leikur liðið lokaleikinn sinn í mótinu en þá mætir Ísland ógnarsterku liði Þýskalands kl. 16:30 að íslenskum tíma. Hægt er að horfa á leikinn á hlekknum hér fyrir neðan og kostar aðgangur að leiknum 5 evrur.