Handknattleikssamband Íslands hefur ráðið Jón Gunnlaug Viggósson sem íþróttastjóra sambandsins.

Jón Gunnlaugur er 41 árs gamall, með BSc í Íþróttafræði frá Háskólanum í Reykjavík og MSc gráðu frá ULPGC í samstarfi við Íþróttaháskólann í Köln. Hann er með EHF Master Coach og Master Coach PRO þjálfararéttindi frá Handknattleikssambandi Evrópu.

Jón Gunnlaugur hefur undanfarin 20 ár stundað handknattleiksþjálfun, þar af meistaraflokksþjálfun síðastliðin 14 ár en nýverið lét hann af störfum sem aðalþjálfari meistaraflokks karla hjá Handknattleiksdeild Víkings eftir viðamikla uppbyggingu handknattleiksdeildarinnar siðastliðin 5 ár.

Hann hefur starfað hjá HSÍ undanfarin 12 ár og unnið gríðarlega kraftmikið starf í grasrótarstarfinu sem og þjálfun yngri landsliða Íslands.

Meðal verkefna nýráðins Íþróttastjóra HSÍ eru yfirumsjón með íþrótta- og afreksmálum sambandsins ásamt yngri landsliðum Íslands. Umsjón með fræðslumálum HSÍ þar með talið menntun handknattleiksþjálfara og útbreiðslu íþróttarinnar. Einnig vinnur íþróttastjóri HSÍ í nánari teymisvinnu með þjálfurum A-landsliðs karla og A-landsliðs kvenna við gerð og eftirfylgni á afreksstefnu sambandsins og þeim verkefnum sem fylgja A-landsliðum Íslands.

HSÍ lýsir yfir mikilli ánægju með að fá Jón Gunnlaug til starfa í þessu umfangsmikla og mikilvæga starfi en hann mun hefja störf á næstu vikum.