Í gær endurnýjuðu Icelandair og Handknattleikssamband Íslands samstarfssamning sín á milli í þjálfunarsetri Icelandair í Hafnarfirði. Icelandair hefur verið dyggur samstarfsaðili HSÍ um árabil. Það er því gleðiefni og gríðarlega mikilvægt fyrir sambandið að áframhaldandi samstarf sé nú tryggt.

Icelandair endurnýjaði einnig samstarfssamninga við ÍSÍ og fjögur önnur sérsambönd, þ.e. Knattspyrnusambands Íslands, Körfuknattleikssambands Íslands, Golfsambands Íslands og Íþróttasambands fatlaðra og er því um að ræða stærsta styrktarsamning íþróttahreyfingarinnar til þessa.

Samstarf Icelandair og viðkomandi sérsambanda felur í sér víðtækt samstarf. Icelandair mun styðja dyggilega við starf þeirra og landsliðsstarf en rekstur landsliða felur í sér mikil og kostnaðarsöm ferðalög um allan heim.

Í samningi Icelandair og ÍSÍ er að finna nýtt ákvæði, fyrir sérsambönd sem ekki eru með sérstakan styrktarsamning við Icelandair, sem felur í sér afsláttarkjör á fargjöldum Icelandair á samningstímanum. Icelandair skal tryggja sérsamböndum ÍSÍ hagstæðustu fargjöld hverju sinni og lægsta mögulega hópfargjald þegar um landsliðshóp er að ræða.

„Samstarf ÍSÍ og Icelandair hefur verið afar farsælt í áratugi og erum við hæst ánægð með að hafa nú tryggt áframhaldandi samstarf fram yfir Ólympíuleikana í Tókýó árið 2020. Stuðningur Icelandair við íþróttahópa ÍSÍ og landslið sérsambanda á ferðalögum til og frá keppni hefur verið ómetanlegur, ekki síst í kringum stór alþjóðleg mót og Ólympíuleika. Víðtækt leiðakerfi Icelandair gerir okkur auðvelt að komast á hagkvæman og öruggan hátt á milli staða“, sagði Lárus L. Blöndal, forseti ÍSÍ við undirritun samninganna.

„Við hjá Icelandair erum mjög stolt að halda ánægjulegu samstarfi við ÍSÍ áfram. Íslendingar eiga afreksfólk á heimsmælikvarða í nánast öllum greinum og það er okkur sönn ánægja að geta staðfest áframhaldandi stuðning við margar af fyrirmyndum Íslands. Íþróttir eru mikill drifkraftur ferðalaga um allan heim, ekki síst í ár þegar margir munu leggja leið sína til Rússlands eða fylgjast með okkar bestu kylfingum,“
 
segir Björgólfur Jóhannsson, framkvæmdastjóri Icelandair. 

Þúsundir einstaklinga ferðast árlega um allan heim með Icelandair til að upplifa íþróttatengda viðburði. 
„Ekki er hægt að hugsa sér betri fulltrúa Íslands en íþróttafólkið okkar. Þau vekja athygli úti í heimi og eru frábær kynning á landinu,“ segir Björgólfur. 

Á myndinni má sjá fulltrúa Icelandair, ÍSÍ, KSÍ, GSÍ, ÍF, KKÍ og HSÍ við undirritun samningana.