HSÍ | 100 ár af handknattleik á Íslandi

Í ár eru liðin 100 ár frá því að handboltinn kom til Íslands og þykir okkur hjá Handknattleikssambandinu það vera mikið fagnaðarefni. Það eru margar skemmtilegar vörður á þessari 100 ára leið og þau voru ófá brosin sem það kallaði fram að fara í gegnum gamalt myndefni tengt íþróttinni til að setja saman auglýsingu í tilefni þessa stóra áfanga.

Sum augnablik gleymast aldrei, eins og þegar kvennalandsliðið braut blað í íþróttasögunni til að vinna titil í hópíþróttum árið 1964. Sama ár varð svo Sigríður Sigurðardóttir, landsliðskona í handbolta, fyrsta konan til að ná kjöri sem Íþróttamaður ársins. Við munum svo  auðvitað öll eftir HM í handbolta sem var haldið á Íslandi 1995 og silfrið sem var öllu gulli betra á Ólympíuleikunum 2008.

Fjöldi barna og ungmenna hafa prófað sig áfram í íþróttinni á þessum langa tíma, óháð árangri trúum við að handboltinn og andinn innan íþróttarinnar fylgi þeim áfram út í lífið. Hreyfingin á svo sannarlega traustasta lið stuðningsmanna sem hægt er að finna og við hlökkum til að fylgja ykkur öllum næstu hundrað árin. Því eins og segir í nýju auglýsingunni okkar eru við rétt að byrja!

Til hamingju með þennan áfanga kæru Íslendingar.

Handknattleikssamband Íslands