Handknattleikssamband Íslands hefur útnefnt handknattleiksmann og handknattleikskonu ársins 2017.

Handknattleikskona ársins:

Handknattleikskona ársins 2017 er Þórey Rósa Stefánsdóttir, hægri hornamaður úr Fram í Reykjavík og leikmaður A landsliðs kvenna.

 

Þórey Rósa er 28 ára, fædd 14. ágúst 1989. Hún spilaði með ÍR til 16 ára aldurs þegar hún skipti yfir í Fram og hóf þar sinn feril með meistaraflokki haustið 2005. Þórey tók þátt í miklum uppgangi kvennaliðs Fram áður en hún fór í atvinnumennsku til hollenska liðsins E&O Emmen. Þá spilaði Þórey í stuttan tíma með Vfl Oldenburg áður en hún flutti sig til Team Tvis Holstebro í Danmörku sumarið 2011. Hún var Evrópumeistari vorið 2013 með Holstebro en flutti sig sumarið 2013 til Noregs þar sem Þórey spilaði með Vipers Kristiansand næstu 4 ár í toppbaráttu í norsku deildinni. Nú í sumar flutti Þórey heim og gekk til liðs við Fram á nýjan leik.

Þann 20. apríl 2011 lék Þórey sinn fyrsta landsleik í Antalya í Tyrklandi gegn heimakonum og skoraði 2 mörk í leiknum. Þórey hefur verið lykilmaður í A landsliði kvenna undanfarin ár, hún hefur spilað 83 landsleiki og skorað í þeim 211 mörk. Auk þess lék Þórey á sínum tíma 31 unglingalandsleik og skoraði í þeim 72 mörk.

Eftir að hafa tekið þátt í toppbaráttunni í Noregi er Þórey Rósa aftur kominn heim til Íslands þar sem hún hefur nú þegar heillað íslenska áhorfendur, hvort sem er á leikjum í Olísdeildinni eða með íslenska landsliðinu.

Handknattleiksmaður ársins:



Handknattleiksmaður ársins 2017 er Guðjón Valur Sigurðsson, vinstri hornamaður Rhein-Necker Löwen í Þýskalandi og fyrirliði A landsliðs karla.

Guðjón Valur er 38 ára, fæddur 8. ágúst 1979. Hann er alinn upp í Gróttu og steig þar sín fyrstu skref með meistaraflokki. Guðjón Valur spilaði með KA á Akureyri áður en hann fór í atvinnumennsku til Þýskalands sumarið 2001.

Í Þýskalandi spilaði hann með Essen og varð Evrópumeistari með þeim árið 2005, seinna það ár gekk hann til liðs við Gummersbach. Árið 2008 gekk hann til liðs við Rein-Neckar Löwen. Það var síðan tímabilið 2011-2012 sem hann söðlaði um og fór til Danmerkur og spilaði þar með AG Köbenhavn þar sem Guðjón var Danmerkurmeistari. Hann fór aftur til Þýskalands 2012 og gekk þá til liðs við Kiel. Hann varð Þýskalandsmeistari og bikarmeistari með Kiel 2013 og Þýskalandsmeistari 2014.

Guðjón Valur gekk til liðs við Barcelona sumarið 2014 og þar sem hann vann alla titla sem í boði voru vorið 2015. Eftir annan Spánarmeistaratitilinn í röð vorið 2016 hélt Guðjón Valur á ný til Þýskalands og gekk í annað sinn í raðir Rhein-Necker Löwen. Með Rhein-Necker Löwen varð Guðjón Þýskalandsmeistari vorið 2017 ásamt því að vera fjórði markahæsti leikmaður þýsku Bundesligunnar.

Guðjón spilaði sinn fyrsta A-landsleik 16. desember 1999 í Haarlem í Hollandi á móti Rúmeníu og skoraði þar 2 mörk. Þá hefur hann verið lykilmaður í landsliðinu um langt skeið. Guðjón Valur hefur leikið 340 A-landsleiki og skorað í þeim 1783 mörk. Þá lék hann 14 leiki með yngri landsliðum og skoraði í þeim 23 mörk.

Þegar rýnt er í feril Guðjóns má sjá að síðan 2012 hefur hann orðið landsmeistari á hverju ári, alls sex ár í röð í þremur af sterkustu deildum Evrópu. Sem atvinnumaður hefur Guðjón Valur verið frábær fyrirmynd ungra handboltaiðkenda bæði hér á landi og erlendis í bráðum tvo áratugi.