Andlát | Davíð B. Gíslason

Davíð B. Gíslason, varaformaður HSÍ, lést á heimili sínu sl. laugardag langt fyrir aldur fram.

Fyrir rétt um ári síðan greindist Davíð með illkynja krabbamein í höfði. Síðasta ár hefur farið í erfiðar meðferðir, bæði geisla- og lyfja til þess að freista þess að vinna bug á meininu, eða a.m.k að halda því í skefjum. Því miður var ekki við neitt ráðið og um miðjan janúar var niðurstaðan sú að meðferð hefði ekki skilað árangri og henni því hætt.

Davíð var einn af lykilstjórnendum Handknattleikssambands Íslands um árabil, frá 2007, bæði sem lagalegur ráðgjafi, í aga-, dómara- og laganefnd. Hann hefur verið formaður laganefndar HSÍ og í stjórn sambandsins sem varaformaður þess frá 2013. Davíð sat í laganefnd ÍSÍ frá 2017 og var formaður þeirrar nefndar frá 2019. Davíð sinnti störfum sínum af mikilli alúð og var ávallt reiðubúinn til að vinna að málum handboltahreyfingarinnar. Mikill söknuður er af fráfalli hans.

Hann hóf handboltaiðkun tólf ára gamall og einungis fimmtán ára var hann farinn að æfa með meistaraflokki Gróttu sem hann lék með lék alla tíð ef frá eru talin tvö keppnistímabil þegar hann lék með Fram. Davíð spilaði jafnframt með öllum yngri landsliðum Íslands.

Auk þess að vera leikmaður Gróttu sinnti hann margvíslegum félagsstörfum fyrir félagið. Davíð sat m.a. í stjórn handknattleiksdeildar Gróttu/KR á árið 2003-2004 og aftur í stjórn handknattleiksdeildar Gróttu tímabilið 2012-2013.

Sorgin er ólýsanleg en minningin mun lifa um ókomna tíð.