Næstu mótsleikir íslenska landsliðsins í handknattleik karla verða í byrjun júní þegar leiknir verða tveir umspilsleikir um þátttökurétt á heimsmeistaramótinu sem fram fer í Egyptalandi í janúar á næsta ári. Vegna þess að íslenska landsliðið sleppur við þátttöku á fyrsta stigi undankeppni HM, sem fram fer upp úr miðjum apríl, er ekki ljóst hver verður andstæðingur Íslands í júníleikjunum. Hinsvegar liggur fyrir landsliðum hvaða þjóða Ísland getur mætt.
Dregið verður mánudaginn 9. mars fyrir umspilsleikina í júní. Ísland verður í efri styrkleikaflokki, það hefur verið staðfest, ásamt Slóveníu, Þýskalandi, Portúgal, Svíþjóð, Austurríki, Ungverjalandi, Hvíta-Rússlandi, Tékklandi og Frakklandi.
Í neðri styrkleikaflokki verða eftirfarandi landslið, eitt þeirra verður andstæðingur Íslands í umspilsleikjunum í fyrri hluta júní:
Norður-Makedónía, Sviss, Holland, Svartfjallaland, Úkraína, Serbía, Tyrkland/Rússland, Rúmenía/Bosnía, Pólland/Litháen, Ísrael/Lettland. Átta síðasttöldu þjóðirnar leiða saman hesta sína á fyrsta stigi umspilsins eins og greint er frá hér að neðan.
Fyrsta stigi umspilskeppni HM fer fram í apríl, um líka leyti og forkeppni Ólympíuleikanna verður háð.
Á fyrsta stigi undankeppni HM taka landslið átta þjóða þátt, þ.e. fjögur neðstu liðin á EM2020, Pólland, Rússland, Bosnía og Lettland auk fjögurra sem unnu hvert sinn riðil í undankeppni sem háð var frá október á síðasta ári og fram í byrjun janúar. Um er að ræða landslið Litháen, Rúmeníu, Tyrklands og Ísrael. Í morgun var dregið hvaða lið mætast og var niðurstaðan eftirfarandi:
Tyrkland – Rússland
Rúmenía – Bosnía
Pólland – Litháen
Ísrael – Lettland
Á HM í Egyptalandi verða þátttökuþjóðir 32, átta fleiri en á undanförnum mótum. Evrópa á sæti fyrir 13 keppnislið auk heimsmeistara Dana.
Þrjú efstu lið EM2020 hafa þegar tryggt sér farseðilinn á HM2021, Evrópumeistarar Spánar, silfurlið Króata og bronslið Norðmanna. Eftir standa 10 sæti sem bitist verður um í fyrri hluta júní.