Um helgina (22. – 24. apríl) fer fram á Selfossi hið árlega Landsbankamót í handbolta keppt er í 7. flokki drengja og stúlkna 10 ára og yngri. Handknattleiksdeild Umf. Selfoss heldur mótið sem er jafnframt hluti af mótaröð HSÍ.

Leikið er eftir minniboltareglum (mjúkbolti), mörk eru ekki talin en áherslan er á að allir spili og skemmti sér innan vallar sem utan.

Um 820 keppendur eru skráðir á mótið á Selfoss um helgina. Búast má við að annar eins fjöldi af foreldrum og liðstjórum heimsæki Selfoss um helgina. Bæjarhátíðin Vor í Árborg er á sama tíma og er mótið hluti af þeim hátíðarhöldum.

Alls eru 170 lið skráð til leiks frá 20 félögum, en leikið verður í íþróttahúsi Vallaskóla og íþróttahúsi FSu.  Liðin gista í Vallaskóla og eru þar í mat. Á kvöldin voru svo kvöldvökur þar sem Gunni og Felix sjá um stuðið.

Mótið hefst á föstudag kl. 16:00 og stendur fram yfir hádegi á sunnudag. Það verða um 80 starfsmenn koma að mótinu sem krefst mikillar skipulagningar. Þökk sé öflugu foreldrastarfi hjá deildinni og reynslu í svona mótahaldi að dæmið gengur upp.

Mótið er fjölmennasta íþróttamót sem haldið er á Suðurlandi ár hvert og fjölmennasta handboltamót á Íslandi.

Landsbankinn á Selfossi er sem fyrr aðalstyrktaraðili yngri flokka starfs handknattleiksdeildar og mótið ber nú nafn bankans áttunda árið í röð. Unglingaráð vill þakka Landsbankanum á Selfossi frábæran stuðning undanfarin ár.